رجيم اللقيمات و شرحه باسهل الطرق

هذه تجربه غير شخصيه ولكنى اخذتها عن لسان صاحبتها بهذه الطريقه.

حابه النهارده اهديلكم واهدى لكل فتوكه طلبت منى الشرح الكامل لتجربتى فى ريجيم اللقيمات لان الكتب او المراجع اللى عالنت كلها للقيمات بتلخبط شويه اى حد عاوز يبدأ يطبق الريجيم وبيكون عاوز وقت كبير عشان يفهم وده بردو حصلى فى البدايه وكنت افضل اسال نفسي انا كده صح ولا غلطالمهم انا هقولكم تجربتى وأسأل الله العظيم ان فتوكات كتير يستفادو منها
ولان الحسد حق بتمنى انكم تصلو على خير الانام سيدنا محمد وتقولو ما شاء الله البدايه 

انا بدأت الريجيم وانا وزنى 86 كجم 
بدأت فى 1-10 -2011
ووصلت لوزن 67 فى نص شهر فبراير 
ملخص للريجيم قبل ما ادخل فى التفاصيل عاوزاكو تعرفو ايه هو اصلا اللقيمات
(والكلام ده عامى من دماغى ودى خلاصه تجربتى وخبرتى مع الريجيم – يعنى مش كلام انشا ممل)

اللقيمات هو النظام النبوى اللى وصانا بيه رسول الله صلى الله عليه وسلم دى اهم نقطه لازم تحطيها فى دماغك قبل ما تبدأى اللقيمات (انتى كده بتستحضرى النيه باتباعك لرسول الله ) وبالتالى هتؤجرى وهتخسي 2×1 


والحديث المشهور عن الرسول صل الله عليه وسلم

يقول صلى الله عليه وسلم
(ما ملأ ابن آدم وعاءً شراً من بطنه.بحسب ابن آدم لقيمات يقمن صلبه،فإن كان لا بد فاعلاً فثلث لطعامه وثلث لشرابه وثلث لنفسه
رواه الترمذي

اللقيمات هو نظام حياه بمعنى ان اللى بينوى يبدأه بيستمر فيه طول عمره ودى حاجه هتكون لا اراديه بعد فتره لان هيحصل تعود على كميه اكل معينه بتدخل المعده اول ما تاكليها بتلاقى نفسك خلاص مش قادره تاخدى لقمه زياده 

وده اللى بيخلى كتير فى المراجع بكتب ان بيثبت الوزن مش معناه انك توصلى لوزنك وبعدين ترجعى تاكلى زى زمان لا معناه انك طبيعتك هتتغير هتلاقى نفسك بتشبعى بسرعه فبالتالى مش هتزيدى فى الوزن 

طيب دلؤئتى السؤال اللى بيفرض نفسك يعنى ايه بقى اللقيمات وازاى ممكن نطبقه 

ريجيم اللقيمات مش بيحدد نوعيه الاكل وده مهم فى ان اى حد باي مستوى معيشي يقدر يطبقه لان نوعيه الاكل مش هى الاساس , ولكن الاساس هو كميه الاكل
خليكو معايا ...


نرجع للاجابه على سؤالنا ازاى نطبق اللقيمات


فى اليوم ليكى 5 لقيمات ووجبه مفرحه (هابى ميل) 

اللقيمات
اى نوع اكل فى حجم تلت الكف 



ودى امثله :

تفاحه - موزه – برتقاله – خياريه – جزرايه (يعنى اى ثمره فاكهه او خضار ) ولو ثمره نوعها صغير زى العنب مثلا تبقا حوالى ¾ كوب منها 
ربع رغيف بجبنه – قطعه بيتزا بحجم تلت الكف – قطعه كيك بحجم تلت الكف – او كرواسو – قرص – كعب غزال (يعنى اى حاجه بحجم تلت الكف )
طيب ينفع مشروبات ؟
ايوة طبعا اى كوب بيكون لقيمه يعنى كوب نسكافيه –كوب عصير – كوب شاى – كوب لبن (اى كوب لاى مشروب يعتبى لقيمه 
طيب تمام كده بالنسبه للحلويات والشوكولاته؟؟
خلى بالكم انا بحكى تجربتى لان فى ناس كتير كانت بتعارضنى وانا بطبق اللقيمات لانى مثلا باكل قطعه شوكولاته كلقيمه ويقولولى كده مينفعش خلى لقيماتك صحيه وووو

بص صدقونى انا كنت مقتنعه 100% بالكلام اللى الدكتور محمد الهاشمى بيقولو ان نوعيه الاكل مش مهمه المهم الحجم 

وفعلا الحمد لله طبقته ونجح معايا

افهمو من كده ان ينفع اخد نص شوكولاته سنيكرز كلقيمه – او نص مارس – او واحده شوكولاته باونتى – وهكذااااا
ممكن كمان قطعه جلاش حلو او كنافه (فاهمنى؟)


خلاص نقطه اللقيمه كده مفهومه:
نيجى بقا للهابى ميل وازاى كنت بعملها
الهابى ميل عباره عن 3 حجات مهمه واساسيه :

اولا طبق سلطه متوسط وعليه معلقه زيت زيتون

ثانيا 
طبق يحتوى على طعام المنزل قسميه 3 اجزاء اول جزء 5 معالق نشويات (ارز او مكرونه او بطاطس او ربع رغيف عيش) .(بعد فتره هتحسي ان 5 معالق كتير وممكن تقللى)تانى جزء قطعه بروتين بحجم تلت الكف (ربع فرخه صغيره من غير جلد – او قطعتين لحم احمر – او سمكه – او 2 بيضه)
تالت جزء لو موجود خضار مطبوخ مثلا (فاصوليا خضرا – ملوخيه – سبانخ .....) وخليهم معلقتين بس

ثالتا طبق يحتوى على قطعه حلويات بحجم علبه الكبريت يعنى مكعب شوكولاته قطعه جلاش صغننه سعات كنت باخد معلقه صغيره شوكولاته نوتيلا 

طيب عرفنا ايه هى اللقيمه وعرفنا كمان الهابى الميل 
اليوم بيكون كالاتى 

تصحى الصبح تاخدى كوبايتين مايه عالريق وممكن تلعبى شويه رياضه او اى حاجه فى البيت سريعه يعنى نص ساعه كده بعد المايه وبعدين الصبح مسموح ليكى الصبح بس 2 لقيمه شوفتو الكرم بئا 

يعنى تاخدى مشروب ولقيمه 
ممكن كوب شاى بلبن ومعاه ربع رغيف بجبنه او ببيضه 
اختارى اى مشروب واى لقيمه انتى تحبيها 
بعد ساعتين الى 3 ساعات فى بدايه الريجيم خليها ساعتين لان لسه المعده مش واخده عالاحجام الصغيره وبعد كده ممكن نزود ل3 ساعات

المهم بعد ساعتين اشربى كوبايه مايه وبعدين لقيمه 
بعد ساعتين تانى ممكن الهابى ميل او لقيمه على حسب كل واحده ويومها بيمشي ازاى وبتتغدى امتى 

لو هابى ميل يبقى قبلها بساعه خدى 3 لوزات او 5 سودانيات وامضغيهم كويس اوى وبشويش لحد ما ينعمو اوى وبعد نص ساعه تانى خدى 3لوزات او 5 سودانيات وبعد نص ساعه كلى الهابى ميل عادى 
بس مهم اوى انك متشربيش مايه ابدا بعد اللوز او السودانى 
اهميه اللوز او السودانى انه بينشط منطقه الشبع فى المعده لان الطعام الصلب بيبقى فى المعده مده طويله واللوز او السودانى طعام صلب فبينشط منطقه الشبع - نقطه الهاشمى للشبع ودى اكتشفها دكتور محمد الهاشمى – والفايده بئا انك تحسي بالشبع بسرعه ومعدتك متكونش اتملت بالاكل وتنشيط المنطقه دى بتخليكى تعرفى امتى تشبعى شبع حقيقي مش مجرد ملى للبطن وانك تخلصى الطبق اللى قدامك وبس

طيب خلاص كده خلصنا اللوز والوجبه المفرحه 

بعد 3 ساعات بتكملى لقيماتك عادى جدا 

المهم ليكى 5 لقيمات ووجبه مفرحه مش مهم وقتهم امتى ولا مين قبل مين اوك 

اسئله مهمه

شرب المايه معادو بيكون امتى؟

قبل اللقيمات او قبل اكل اللوز قبل الوجبه المفرحه 
وبعد اللقيمه او الهابى ميل بنص ساعه على الاقل مش قبل كده 
يعنى مفيش مايه فى وسط الاكل او بعد الاكل مباشره 
والسبب ان الاكل الصلب بيفضل فى المعده فتره طويله وبتحسي بالشبع فتره اطول لكن لو شربتى مايه فى وسط او بعد الاكل هيكون الطعام فى المعده اتحول لشبه سائل بالتالى مش هيبقى فى المعده فتره طويله وبالتالى فتره الشبع هتقل

معاد الهابى ميل ممكن يكون بليل ؟

مفيش اى مشكله فى معاد الهابى ميل (الكلام ده انا سمعته من الدكتور محمد الهاشمى نفسه فى فيديو ليه مع دعاء عامر)


ممكن نستبدل اللوز او السودانى باى مكسرات او اكل تانى ؟

لا اللوز او السودانى بس فقط لا غير مينفعش اى حاجه تحل محلهم (فى ايام مكنش بيكون عندى ولا لوز ولا سودانى فمكنتش باخد حاجه قبل الهابى ميل بشرب مايه وبس}

ايه هى البنفسجيات وايه فايدتها ؟
البنفسجيات هى انواع من الفاكهه والخضار زى:
الفراوله – الكرنب البنفسجى – الاراصيا – الرمان – التوت – الزبيب الغامق – البادنجان – العنب الاسود – الكريز
ودى ضروريه لفقدان الوزن ولازم تكترو منها وتاخدو منها لقيمات وده كلام نقلا عن الدكتور محمد الهاشمى عليكِ كثرة تناول اللقيمات من الأنواع التي تحتوى على مادة ( الانثو سيانين )، لأنها من أقوى مضادات الأكسدة، مشيراً إلى أنه إذا كان تلوث البيئة عامل أساسي في ضمور الدهون البنية فإن تنشيطها سيكون باستخدام مضادات الأكسدة

والدهون البنيه دى بتساعد على زياده معدل الحرق وهى بقل نتيجه التلوث واللى بيزودها البنفسجيات دى 

ايه لازمه الحلويات فى الوجبه المفرحه ؟ وهل ممكن الاستغناء عنها عشان نخس بسرعه؟

الحلوى فى الوجبه المفرحه تشعر العقل بالسعاده والنشوة وبالتالى العقل هيشتغل بشكل جيد جدا وكمان هيعمل على ارسال اشارات لحرق الدهون لانك بتحققيله رغباته (خلو بالكو يا فتوكات جسمكم زكى جدا ولازم تفهمه طلباته وتحققيها عشان يبدا ينفذ اللى انتى عاوزاه مينفعش تحرميه وتعيشيه فى مجاعه هيرفض رغباتك فى انك تخسي مش هيسمعلك اتعاملى معاه انو فاهمك وانتى افهميه مش بتسمعو بنات بتقول بعمل ريجيم بقالى شهر وحارمه نفسي من الاكل وجيت اوزن نفسي لاقيتنى ثابته ؟؟ لان الجسم بيعند وبيجاف من المجاعه اللى انتى حطتيه فيها وبالتالى بخزن اى جرام دهون بيدخلوو)

هل المشروبات بدون سكر تعتبر لقيمه؟ وكام معلقه سكر مسموح بيها فى اليوم؟

لا المشروبات بدون سكر او لبن متعتبرش لقيمه يعنى يانسون بدون سكر شاى بدون سكر نسكافيه بلاك بدون سكر كل ده ميعتبرش لقيمه
امتى المشروب بيكون لقيمه لما تحطه عليه سكر او لبن او طبعا العصاير 

وليكى فى اليوم 5 معالق سكر توزعيهم زى مانتى عاوزه 
بس من خلال تجربتى حاولت على اد ما اقدر اقلل استهلاكى للسكر فى المشروبات كنت بشرب كل حاجه 3 معالق زمان بدات اخليهم معلقه ونص لمده اسبوع ولحد ما اتعودت على الطعم ده وبعدين خليتها معلقه وبعدين دلوئتى بشرب اى حاجه بنص معلقه او من غيييير خالص
ايه اخبار المكرونه بشاميل والمحشي والبيتزا فى الوجبه المفرحه

اليوم اللى كنت بعمل فيه مكرونه بالبشاميل مثلا كنت باخد قطعه واحده مربعه اد تلتين الكف كده ومعاها سلطه 
واليبتزا باخد شريحه بيتزا واحده بردو معاها سلطه 

والمحشى 5 صوابع على انهم النشويات ومعاهم قطعه دجاج مثلا وسلطه[
بس كده يا فتوكات عاوزه اقولكم بئا ان شرب المايه مهم جدا جدا جدا جداااااااااااا لانها بتساعد على انك تخسي بسرعه بصى اى حاجه بتتم فى الجسم اى عمليه حرق دهون اى تخلص من السموم والدهون بتتم فى وجود المايه فهى كمان ضروريه عشان لما تخسي باذن الله ميكونش عندك ترهل ولا شحوب
وكمان احنا طبعا بنقول انك تاكلى كل حاجه 


بس عن تجربتى حاولت على ق ما اقدر اخلى اكلى قليل الدهون وصحى اكتر 

يعنى مفيش مانع اكل بيتزا بس نص دقيق اسمر ونص ابيض

مفيش مانع اكل مكرونه بشاميل بس البشاميل بعمله من غير دهون 

بقلل الدهون فى كل اكل بعمله بستخدم طاسات وحلل تيفال عشان ميلزقش الالكل واقدر اقلل الدهون 
الحمد لله انا وزنى ثابت عند 67 بس رجعت استهبلت شويه لمده شهرين واكلت حلويات زياده فوصلت ل70 بس الحمد لله ظبطت تانى وشويه رياضه دلوئتى انا 66 ونص والحمد لله 

مرتاحه جدا وباكل كل اللى نفسي ومعدتى الحمد لله مرتاحه مفيش امساك ولا اسهال
انا تحت امركم فى اى سؤال 

واتمنى انكم تقيمو الموضوع 
عشان كل البنات اللى بتسأل عن ريجيم اللقيمات يشوفوه ويستفادو منه
وهسيب الرد اللى جاى عشان لو افتكرت اى حاجه تانى اكتبها